唔好畀我阿媽知道Morning Call市價收$40 / 兩分鐘
上星期有個同事打我內線, 劈頭第一句就問: 女朋友表妹個friend話要搵工, 有冇啲文員, 或者admin之類, 二萬零蚊人工。
我: 文員二萬零蚊? 食懵咗你呀? 好多年經驗? 靚大學?
同事: 唔係呀, 好似係18定19歲, 未做過full time, 中五畢業。
我: 玩嘢呀！
同事: 唉, 聽我女朋友講, 表妹個friend之前係做ptgf, 唔知點解屋企人發現咗, 而家六國大封相, 咪叫我幫手搵份正正經經嘅工畀嗰個女仔囉, 我都知難, 盡人事問下啦。
我: 咩係ptgf? 任達華PTU我就知。
同事: Part Time Girlfriend呀, 你唔係未聽過呀? 佢話一萬幾千唔做喎, 循例問下當盡咗力啦。
即係援交? 乜而家潮流興叫ptgf? 我個人冇歧視既, 仲好支持迷途羔羊行返正路, 但冇degree冇經驗叫價二萬零蚊? 咁對比其他讀咁多書, 做生做死累積咁多經驗嘅人, 會唔會唔多公平呢?
忍唔住去Google, 原來之前網上都流傳一篇ptgf嘅自白, 內容大約係話, 返麥記7仔呢啲工得幾廿蚊時薪, 做嚟都浪費時間, 又揚言要搵好多錢去做自己想做嘅事, 包括旅行呀, 買包包呀, 海外升學咁。
我唔知係個世界行得太快, 還是我行得太慢, 我實在唔理解呢套諗法, 社會笑貧不笑娼, 係因為有啲人為咗生活真係冇辦法, 但得十幾歲咁後生, 真係冇第二條路可以揀咩?
搵得少錢, 邊個會開心先, 不過搵得多錢, 都唔一定換到快樂, 好視乎你追求啲乜, 或者想過點樣嘅生活。
By the way, 價目表話唱K盛惠 $1600蚊陪唱3個鐘, 去紅館聽容祖兒陳奕迅買貴飛都唔使$1600啦, 睇套戲又要 $600, 唔好去搶? Morning Call都收 $40蚊兩分鐘, 呢個香港係咪咁多老闆呀? 其實我阿媽每朝都Morning Call我十幾次, 我諗我都係時候要添啲家用畀佢。
#ptgf
Search